Беларусь не вызначаецца экзатычнымі краявідамі, але наша краіна мае багатую і слаўную гісторыю. І калі з’явілася цудоўная магчымасць наведаць Мірскі замак і замак - палац у Нясвіжы, вучні, іх класныя кіраўнікі і бацькі навучэнцаў вырашылі наведаць гэтыя ўнікальныя аб’екты, уключаныя ў спіс сусветнай культуры ЮНЕСКА.

   Цудоўны настрой суправаджаў усіх з таго часу, як дарослыя і дзеці размясціліся ў камфартабельным аўтобусе, і да канца экскурсіі. Калі выпадала вольная хвіліна, дзяўчаты спявалі, хлопцы арганізоўвалі займальныя віктарыны.

   І вось мы ля Мірскага замка. Уразіў не толькі цікавы аповед экскурсавода, але і велічныя вежы, магутныя сцены, выдатны парк. Крочылі па багата ўпрыгожаных разьбой і пазалотай залах і часам узнікала ўражанне, што трапілі ў іншую рэальнасць, у іншае стагоддзе.

   Далей мы скіравалі свой шлях у Нясвіж. Наведалі Нясвіжскі касцёл Божага цела, які стаў першым у Рэчы Паспалітай храмам у стылі барока: пышныя фрэскі, карціны, мармур і пазалота. Пад касцёлам размясцілася крыпта Радзівілаў – трэці ў Еўропе магільны склеп па колькасці пахаванняў.

   Ну і, безумоўна, нікога не пакінуў абыякавым Нясвіжскі палац, які ў XVI стагоддзі прыгажосцю і пышнасцю аздаблення ствараў канкурэнцыю шматлікім каралеўскім палацам: паркет з каштоўных парод дрэва, унікальнае аздабленне столі, сцены, пакрытыя пазалотай. Гэта сапраўды містычнае месца і адно з самых загадкавых у Беларусі, у сценах якога шукае заспакаення душа Барбары Радзівіл.

   Задаволеныя цікавай вандроўкай, з разнастайнымі сувенірамі, незабыўнымі ўражаннямі, мы вярнуліся ў родны Магілёў.