Паўнаводная, шырокая плынь беларускай літаратуры, як сцвярджаў Іван Навуменка, у вельмі вялікай ступені жывіцца яе магутнымі настаўнікамі – Янкам Купалам і Якубам Коласам.
2017 год у Беларусі праходзіць пад знакам 135-гадовага юбілею вялікіх песняроў беларускага народа, класікаў нацыянальнай літаратуры Янкі Купалы і Якуба Коласа.
Якуб Колас і Янка Купала – выразнікі нацыянальнай самасвядомасці, народных пачуццяў. У сваіх творах яны раскрылі нацыянальны характар, асаблівасці духоўнага складу і жыцця беларусаў, выявілі незвычайную сілу і творчую магутнасць беларускага слова.
Янка Купала і Якуб Колас – гэта сапраўдны пачатак усіх пачаткаў у беларускай культуры, літаратуры і мастацтве. Яны не толькі знакавая з’ява, якая сведчыць аб вяршынях нацыянальнай творчасці, але і яскравае выяўленне народнага духу, мастацкі ўзор, высокі прыклад, на які не можа не арыентавацца ўся наша нацыянальная культура і мастацкая літаратура.
Вобразы Я. Купалы і Я. Коласа знайшлі значнае ўвасабленне ў мастацтве, а іх творы сталі крыніцай натхнення для многіх рэжысёраў, кампазітараў, жывапісцаў. Сярод іх – народны мастак Беларусі Міхаіл Савіцкі, важнае месца ў творчасці якога належыць асобе Я.Купалы і героям яго твораў. Для беларускага мастака Васіля Шаранговіча крыніцай творчага натхнення з’явілася паэма Я. Коласа “Новая зямля”. Для юбілейнага выдання паэмы, якую даследчыкі лічаць энцыклапедыяй жыцця беларускага сялянства, у 2002 годзе мастак стварыў 91 акварэльны малюнак.
Беларускія кампазітары таксама звярталіся да творчасці Я. Купалы і Я. Коласа. Імі напісана шмат песень грамадзянскага і лірычнага гучання.
Многія як сталыя майстры пяра, так і маладыя пісьменнікі свой творчы поспех звязваюць з Янкам Купалам і Якубам Коласам. З гэтымі па-сапраўднаму нацыянальна значнымі імёнамі нашых класікаў акрэслены лёсавызначальная сутнасць беларускай літаратуры, яе дасягненні, яе імклівы эстэтычны і гістарычны рост і росквіт, бо Колас і Купала з’яўляліся выразнікамі нацыянальнай самасвядомасці, народных дум і пачуццяў.
|